samedi 26 juillet 2008

Nòvas de França


De nòvas de França, n`avèm pas cap. Aquí la primièira que veni de trobar dins lo jornal la "Segunda" del dimècres 23 de julhet.

Tangata Manu

Sus Rapa Nui i a un luòc extraordinari : es lo volcan RANA KAU




Mas quand i montas, i tròbas tanben a costat un autre luòc que se ditz ORONGO


Es un espaci sagrat que s´i debanava la ceremonia de Tangata Manu (l´òme aucèl). Ai pas temps de vos contar tot en detalh, mas imaginatz qu´a la prima australa los hopu (de servicials) devián cabussar e anar quèrre sul MOTU NUI (iscla mai luènh) lo primièr uòu d´ironda pondut (sens se far manjar per las làmias).
Lo primièr que podiá tornar amb l´uòu permetiá a son mèstre de venir Tangata Manu pendent una annada.
Las pèiras pòrtan testimoniatge d'aquel ceremonial.
Lo Tangata Motu que se deviá rasclar lo cap e las ussas veniá aital un personatge sagrat, lo mai important de l´iscla. Pendent un an se deviá pas ni lavar, ni copar los pels e deviá viure isolat.
Mas las fèstas annadièras d´Orongo s´acompanhavan tanben de sacrificis umans. Es aquò que los missionaris an ordenat la fin d´aquel ceremonial a la fin del sègle XIX.

Rapa nui

Qualques imatges de Rapanui... pensi que n´ai fach tres cents !





mercredi 23 juillet 2008

Isla de Pascua

MOAI : Mela(nesian) style





La Virgen del Combre

A Santiago la prima arriba. Los ametlièrs e las mimòsas darrièr l´ostalariá (El Castillo çai-sota) començan de florir.

Sèm montats sul puèg darrièr. Es la passejada del dimenge pels estajants de Santiago. Aquí coma pertot una Verge, mas enormissima. Coma los Indians n´avián pas mai de besonh d´aquel ròdol que autres còps se sonava TAPUHUE, lugar de Dios, (vos sovenètz qu´an disparegut per de rasons divèrsas) i an fach un santuari.






Pastel de jaibes

Se manja plan a Santiago. Lo qu´aima lo peis e las fruchas de mar es al paradís. Ieu me soi regalat amb lo pastel de jaibes.


Al Caramiño, restaurant plan conegut del barri Bellavista, se pòt escriure sus las parets.



Per los que pòdon pas legir:" Que triste es amor sin ser amado, pero mas triste es cagar sin aver almorzado".
A costat de ieu èra escrich : " Estudia hasta la muerte y serás un cadáver culto".

lo musèu de las arts precolombianas de Santiago

Lo musèu presenta un escapolon plan ordenat de totas las arts.
Impressionanta aquela esculptura cobèrta d´una pèl de monin!

Dins un canton del musèu se pòt legir : "los Indians an disparegut a bèles paucs... per de rasons divèrsas" (!!!)

samedi 19 juillet 2008

Pas le temps

tout va bien, mais pas le temps

vendredi 18 juillet 2008

La Virgen del Carmen (16 de julhet)

Segur que lo catolicisme se pòt pas dissociar de l´America del Sud. Dins quin ròdol que siá, i a totjorn quicòm per o te rapelar.


Santiago uèi de matin . pas un cat per las carrièiras (de cans en escambi n´i a pertot, e mai amb de mantèls de lana! Es curiós d´alhors de veire de cans abandonats dins de mantèls de lana. Enfin!).



10 oras donc e pas un cat, pas degun, pas un magasin de dobèrt, pas un cafè. Sèm dimècres pamens ! Caminam, prenèm lo mètro, vuèg, el tanben. Davalam. Plaza de Armas. Aquí o comprenèm tot : Son totes aquí.


Es la fèsta de la Virgen del Carmen. E quand los Latinoamericans te festejan la Santa Verge (caldriá puslèu dire las Santas Verges qu´ai l´impression qu´aquí, n´an plan mai que nosautres de Verges) es quicòm.

jeudi 17 juillet 2008

Santiago de Chile

Servís a quicòm de viatjar ? O me demandi a cada còp abans de partir.

Mas un còp partit, comprenes perqué es essencial d'o far. D´un costat i a çò que sabes, de l´autre i a çò que ne fas l´experiéncia. Per exemple, l'ivèrn en estiu. Quand arribas de Barcelona, en camisòt, aquò t´impresiona plan mai que l´aiga que, dins l´emisfèri sud, s´escapa de l´aiguièr en remolinar dins l´autre sens.
Per çò qu´es de l´ivèrn, l´ai experimentat uèi en sortir de l´avion : un cèl cobèrt, los arbres desfolhats e una freg que pèla.



En Equator o al Peró aviam pas jamai agut tan freg coma aquí. La nuèch, dins las Andas del Peró o d´Equator, gèla, aquò rai, e val mai preveire de qué se cobrir se dormisses defòra, mas dins la jornada lo solelh te crama la pèl. A Lima te fa de contunh un temps pegós e tebés. A Santiago per contra arribas en plen mes de julhet e as l´impression que Nadal es pas luènh : mantèls, bonetas sul cap e lo mond que te parlan pas que d´anar far d´eski. Pareis que las estacions e la nèu se veson plan de la vila quand lo cèl es clar, mas per uèi es mancat.

mardi 8 juillet 2008

Mas qué fa la Pibola dins l'estiu ?

Dins qualques jorns, Pibola serà en vacanças.

Mas ont las passa las vacanças la Pibola ?
Ailà benlèu ? Qué ne disètz ?
O puslèu aquí ?




Bon ! E ieu dins tot aquò ? Volètz saber ont me vau amagar per escapar al trabalh ?
O veiretz ben dins qualques jorns!
(a condicion plan segur que i aja d'electricitat e d'ordenadors, autrament mon projècte risca plan de far fogassa).